திருமதி.காந்தி

ஒவ்வொரு வெற்றிகரமான மனிதனுக்கு பின்னால் ஒரு பெண் இருக்கிறாள் என்ற வாசகத்துக்கு உதாரணமாக மகாத்மா, தேசபிதா என்று அறியப்பட்ட காந்தி அவர்களின் வாழ்க்கைக்கு பின்னால் இருந்தார் கஸ்தூரிபா. 'பா' என்று காந்தி அன்புடன் அழைத்த கஸ்தூரிபா, பொறுமைக்கு, சகிப்புதன்மைக்கு உறைவிடமாய் வாழும் இந்திய பெண்களுக்கு ஒரு உருவகம்.

ஏப்ரல் 11, 1869 ஆம் வருடம், குஜராத் மாநிலம் காந்தி பிறந்த அதே போர்பந்தரில், கோகுலதாஸ் என்ற தொழிலதிபருக்கு மகளாக பிறந்தார் கஸ்தூரிபா. 

 

மிகவும் ஆச்சாரமான, கட்டுப்பாடுகள் நிறைந்த வைஷ்ணவ குடும்பம் அவருடையது. 1883 ஆம் வருடம் காந்தியை அவர் திருமணம் முடித்தபோது அவர் வயது 13 மட்டுமே. படிப்பறிவோ, பட்டறிவோ இல்லாத மழலை பருவம் தாண்டாத, வெளியுலகம் சிறிதும் அறியாதவராய் இருந்தார் அவர். அவருக்கு காந்தி அவர்களே ஆசிரியராய் இருந்து ஆங்கிலம்,சமஸ்கிரதம் உட்பட்ட கல்வியை போதித்தார். காந்தி அவர்கள் மேற்படிப்புக்காக லண்டன் சென்றபோது, தனது முதல் மகன் ஹரிலால் பிரசவத்தின் பொருட்டு, இந்தியாவில் இருந்தார் கஸ்தூரிபா.

1906 ஆம் வருடம் காந்தி அவர்கள், உடலுறவை முற்றிலும் புறக்கணித்து, பிரம்மச்சரியத்தை தனது கொள்கைகளில் ஒன்றாக ஏற்றுக்கொண்டபோது, அதை முழு மனதோடு ஒப்புக்கொண்டார் கஸ்தூரிபா. சிறுவயது முதலே ஊறிப்போன தனது ஆச்சார, அனுஷ்டங்களை துறந்து காந்தி அவர்களோடு சாதி வேறுபாடுகளை பாராட்டாத ஆஸ்ரமங்களில் தங்கினார்.

1897 ஆம் வருடம் காந்தியுடன் தென்னாப்ப்ரிக்கவுக்கு பயணமானார். 1913 ஆம் வருடம் தென் ஆப்ரிக்காவிலுள்ள இந்தியர்களுக்காக போராடி காந்தி கைதானபோது கஸ்தூரிபாவும் ஜெயிலுக்குச் சென்றார்.

அங்குள்ள இந்தியர்கள் கஸ்தூரிபாவுக்கு 52 பவுன் நெக்லஸ் ஒன்றை பரிசாகத் தந்தனர். அதை விற்று கிடைத்த பணத்தில், ஒரு டிரஸ்ட் அமைத்தார். அந்தப் பணத்தை அங்குள்ள மக்களுக்கு உதவும்படி செய்தார்.

இந்தியா திரும்பியதும், சுதந்திரப் போராட்டத்தில் பங்கு கொண்டு காந்தி சிறை சென்றதைப் பார்த்தார். விஷயம்புரியாவிட்டாலும்கூட, "என் கணவர் ஏதோ நல்ல விஷயத்துக்காக ஜெயிலுக்குப் போகிறார். நானும் அதுபோலசெல்கிறேன்' எனக்கூறி, மகளிர் அணிக்கு தலைமைப் பொறுப்பேற்று ஜெயிலுக்குப் போனார்.

ஒருமுறை ஜெயிலில் இருந்து வெளியிட்ட ஒரு அறிக்கையில், "வெள்ளையவர்களிடமிருந்து நாட்டை மீட்க பெண்களும் காங்கிரசுடன் இணைந்து போராட வேண்டும். கதராடை அணிந்தால் பொருளாதாரப் பிரச்னை தீரும். நெசவு வேலையில் பெண்கள் முக்கியமாக ஈடுபட வேண்டும். நம் நாட்டு துணி வியாபாரிகள் வெளிநாட்டு துணிகளை விற்கக் கூடாது' என்று கூறியிருந்தார்.இந்தியா முழுவதும் எதிரொலித்தது இந்த போர்குரல். உடனே கதராடையை ஏற்று கொண்டனர் மக்கள்.

அவருக்கும், காந்திக்கும் இடையே நடைபெற்ற ஒரு சுவாரசியமான சம்பவம்.

உப்புச் சத்தியாக்கிரகத்தைத் தொடங்கு முன், வழக்கம் போல் காந்தி தேசம் முழுவதும் சுற்றுப்பயணம் செய்தார். இந்த யாத்திரையின் போது காசிக்குச் சென்று ஸ்ரீ பிரகாசா என்பவர் வீட்டில் தங்கினார். அங்கிருந்து கிளம்பும்போது அக்குடும்பத்திலுள்ள எல்லோரும் காந்திஜியை வழியனுப்ப ஒன்று கூடினர். அவர்களில் ஸ்ரீ பிரகாசாவின் தாயாரும் ஒருவர். திடீரென்று அவள் காந்திஜியிடம் ‘மஹாத்மாஜீ, தாங்கள் ‘பா’விடம் மனம் நோகும்படி நடந்து கொள்ளுகிறீர்கள்’ என்றாள்.

இதற்க்கு சில நாட்களுக்கு முன் கஸ்தூரிபா செய்த சிறு தவறுக்காக ‘என் வருத்தம்; என் வெட்கம்’ என்ற உணர்ச்சி மிக்க கட்டுரையைக் காந்திஜி எழுதியிருந்தார். இந்தக் கட்டுரையில் கடுமையான வார்த்தைகளால் கஸ்தூரிபாவைக் கண்டனம் செய்திருந்தார். யாரோ ஒருவர் கஸ்தூரிபாவிடம் ரூபாய் நான்கு நன்கொடையாக்க் கொடுத்திருக்கிறார். அதை உரிய நேரத்தில் ஆசிரமத்தின் கஜானாவில் ‘பா’ சேர்க்க முடியாமற் போயிருந்தது. இந்தக் கட்டுரையைப் படித்த பலருக்கு மிகுந்த வேதனை ஏற்பட்டது.

இதனை மனதில் எண்ணிக்கொண்டுதான் ஸ்ரீ பிரகாசாவின் தாயார் காந்திஜியிடம் மேற்சொன்ன சொற்களைக் கூறினாள். ஆனால் காந்திஜியோ முற்றும் துறந்த முனிவராயிற்றே; சிரித்துக்கொண்டே, ‘பா’வுக்கு நான் சாப்பாடு போடுகிறேன், உடுக்க துணிமணி கொடுக்கிறேன். அவளை நான் கவனித்துக் கொள்கிறேன். மீண்டும் அவள் குறை கூறுகிறாளா? என்று கேட்டார்.

‘நான் ‘பா’வுக்குக் கொஞ்சம் ரூபாய் கொடுக்க விரும்புகிறேன். ஆனால் அவள் வாங்கிக்கொள்வதில்லை. வாங்க அனுமதியுங்கள்’ என்றார் அம்மையார்.

மகாத்மா இதை ஒப்புக் கொள்ளவில்லை. ‘இல்லை, இல்லை, ரூபாய் ‘பா’வுக்குக் கொடுக்கவேண்டாம், ஸ்ரீபிரகாசாவிடம் கொடுங்கள். ஏனென்றால் அவர் எனக்காக்க் கஷ்டப்பட்டு நிதிசேர்த்துக் கொண்டிருக்கிறார். தாங்கள் கொடுக்கவிரும்பும் பணத்தை அந்த நிதிக்கே கொடுத்துவிடுங்கள்’ என்றார். கடைசியில் அம்மையார் ‘பா’வுக்கு கொண்டுவந்திருந்த காசை அந்த நிதிக்கே கொடுத்துவிட்டார்.

1944, பிப்ரவரி 22, தனது 74 வது வயதில், மாரடைப்பு காரணமாக இறைவனடி சேர்ந்தார் கஸ்தூரிபா. காந்தி இறந்தபோது, "ஹே ராம்' என்று சொன்னதைபோன்று. அன்னை கஸ்தூரிபா இறப்பதற்கு முன் "ஆண்டவனே அபயம்.கருணை வேண்டி இறைஞ்சுகிறேன்' என்றார்.

கொள்கைகளுக்காக வாழ்ந்த மனிதர்களுடன், அவர்கள் நலனே தனது கொள்கை என அனுசரித்து, தியாகமனப்பான்மையுடன் வாழ்ந்த திருமதி. காந்தி மற்றும் திருமதி.பாரதி போன்ற பாரத தேசத்தின் பெண்மணிகள் காந்தி, பாரதியைவிடவும் போற்றுதற்குரியவர்கள்தானே?.

காந்தியின் இன்றைய முக்கியத்துவம் என்ன ?

காந்தி ஒரு ஆளுமை. ஒரு சித்தாந்தம் அல்ல. அந்த மனிதரை நாம் அறியும் போது நமது கண்கள் இந்த கலாச்சாரத்தையும் இங்குள்ள வாழ்வையும் வேறு விதமாகப் பார்க்க ஆரம்பிக்கும். அது மிக முக்கியமானது. நமது கண்கள் இப்போது நம்முடையவையல்ல. அவற்றில் உள்ள ரத்தமும் சதையும் மட்டும்தான் நம்முடையவை. பார்வை இரவல் வாங்கப்பட்டது. இரவல் பார்வையும் இரவல் குரலுமாக எவரும் இந்நாட்டு மக்களை அணுகி விட முடியாது
- ஜெயகாந்தன்:

அக்டோபர் 2, காந்தி பிறந்த தினம்.

வாழ்க நீ எம்மான்! இந்த
வையத்து நாட்டிலெல்லாம்
தாழ்வுற்று வறுமை மிஞ்சி
விடுதலை தவறிக் கெட்டு
பாழ்பட்டு நின்ற தாமோர்
பாரத தேசம் தன்னை
வாழ்விக்க வந்த காந்தி
மகாத்ம! நீ வாழ்க! வாழ்க!
- பாரதியார்.


தாக்கமும், ஆக்கமும்
இன்பா

(இது கடை(த்)தெருவின் முதல் பதிவு, இன்று மறுபதிப்பில்).

'பாரத ரத்னா' டாக்டர் கலைஞர் - ஒரு இலக்கிய விளக்கம்

செய்தி :  நாட்டின் உயரிய விருதான பாரத ரத்னா விருதிற்கு திமுக தலைவர் கருணாநிதியின் பெயர் விண்ணப்பிக்கப்பட்டுள்ளதாக தகவல் வெளியாகியுள்ளது.

பாரத ரத்னா விருதை வழங்க வேண்டும் என்று திமுகவே விண்ணப்பித்திருக்கிறது.
 
ஒரு இலக்கிய விளக்கம்(!)
 
சிலப்பதிகாரத்தில்
வழக்குரைக் காதை.
ஒரு
சீர்மிகு காட்சி.

"யாமுடைச் சிலம்பு
முத்துடை அரியே" யென
காற்சிலம்பை
கழட்டிவீசுகிறாள்
கண்ணகி.

மன்னவன்
வாய் முதல்
தெரித்தது
சிலம்பின் மணிகள்.

இக்காட்சியில்
கண்ணகி வேடத்தில்
நமிதா நடித்தால்
எப்படி இருக்கும்??

அப்படித்தான்
இருக்கும்.
கருணாநிதிக்கு
பாரத ரத்னா.

-இன்பா

ஒரு 'சாரா' கவிதை

செய்தி :   21 வயது நிரம்பிய Victoria's Secret மொடலான Sara Sampaio நேற்றையதினம் மியாமி ஹோட்டலில் குளித்துக் கொண்டிருந்தபோது அவரின் மேற்பாகத்தின் முடிச்சு அவிழ்ந்து ஒருகணம் டாப்லெஸ் ஆகிவிட்டார்.

இதுக்கென்றே காத்திருந்த கமராகாரர்கள் சட்டென்று கிளிக்கிவிட, அப்போதுதான் கைகள் இருப்பது நினைவுக்கு வந்தது போன்று கைகளால் மறைத்துவிட்டார்.

உன் கைகளுக்கும்

கேமரா கண்களுக்கும்

இடையே போட்டி.

வென்றது

உன் கைகள்.

ஆனாலும்

தோற்கவில்லை

கேமரா.

-இன்பா

"முகமூடி" - கிழிந்தது

"கிராமத்தில் இருந்து பெட்டியை தூக்கிக்கொண்டு உதவி இயக்குனர் ஆக வேண்டும் என்று வந்து விடுகிறார்கள். சினிமாவுக்கு வருவதற்க்கு இலக்கிய அறிவும், உலக சினிமாவும் தெரிந்து இருக்க வேண்டும்" என்று ஒரு முறை கூறினார் மிஷ்கின்.

"எல்லாம் தெரிந்தவர்கள் போன்று ப்ளாக்கில் சினிமாவை ஆளாளுக்கு விமர்சிக்கிறார்கள்" என்றும் அவர் கூறி இருக்கிறார்.

பாரதிராஜாவுக்கு முன்பே கிராமத்தில் இருந்து வந்து சாதித்தவர்கள் இருக்கிறாரிகள். இன்றும் நல்ல இயக்குனர்கள் வந்து கொண்டே இருக்கிறார்கள். சசிகுமார்,சமுத்திரகனி உட்பட பல இயக்குனர்கள் ஏன் கே.பாலச்சந்தர், கமல் கூட கிராம பின்புலம் கொண்டவர்கள்தான்.

இவர்களுக்கு மத்தியில், இதுவரை கொரிய மற்றும் ஜப்பானிய மொழி படங்களை அப்படியே 'ஈ அடிச்சான் காப்பி' அடித்து 'பெயர்' வாங்கிய தமிழ் நாட்டு மிஷ்கின் இயக்கத்தில் வெளி வந்து இருக்கும் "முகமூடி" படத்தை ஹாலிவுட்டோ - சீனோ படம் என்று கூறலாம். பேட்மேன் மற்றும் ஜாக்கிசான்,ப்ருஸ் லீ நடித்த படங்கள் என ஒரு டெஸ்ட் டியுப்பில் போட்டு 'கலக்கி' இருக்கிறார் மிஷ்கின்.

விமர்சனம் எழுதுமளவுக்கு கூட படத்தில் ஒன்றும் இல்லை. படத்தின் 'ஒவர் சீன்' போட்ட பாடல் வெளியிட்டுவிழா அதன் பின் வெளியிடப்பட்ட பேட்மேன் 2 பாணி ட்ரைலர் இவற்றை பார்க்கும்பொதே ரிசல்ட் ஒரளவுக்கு தெரிந்து விட்டாலும், கிராமத்தில் இருந்து இயக்குனர் கனவுகளோடு வரும் இளைஞ்சர்களை கேவலமா பேசிய மிஷ்கினை விமர்சிக்கவே படம் பார்த்தேன்.

ஜீவாவின் நடிப்பு திறமையையும், ஒளிப்பதிவாளர் சத்யா போன்ற டெக்னிசியனகளின் உழைப்பையும் எப்படி வீணடிக்கலாம் என்று மிஷ்கின் ஒரு வகுப்பே நடத்தலாம்.

உதவி இயக்குனராக வர உலக சினிமா அறிவு முக்கியம் என்று மிஷ்கின் சொன்னதன் அரத்தம்...அப்பொதுதான் அவற்றை காப்பி அடிக்க எளிதாக இருக்கும் என்பதே என்பது அவரது படங்களை பார்க்கும்பொது நமக்கு புரிகிறது.

இந்த படத்தின் 'மெகா' தோல்விக்கு பிறகாவது, கிராமத்தில் இருந்து வந்து இயல்பான படங்கள் மூலம் சாதித்து கொண்டிருக்கும் 'களவானி' சற்குணம், 'தென் மேற்கு பருவகாற்று" சீனு ராமசாமி, சமிபத்திய 'அட்டகத்தி' ரஞ்சித், 'மதுபான கடை' கமலகண்ணன் போன்றவர்களிடம் பாடம் கற்க வேண்டும்.

கதை,திரைக்கதை,வசனம்,இயக்கம் எல்லாம் டைட்டில் கார்டில் மட்டுமே இருக்கிறது.

"முகமூடி" - மிஷ்கினின் அகம்பாவம் மிகுந்த 'அறிவு ஜீவி' முகத்திரையை கிழித்து இருக்குறது.

-இன்பா

'சிவாஜி 3D' - மீண்டும் ஒரு திரைவிமர்சனம்

லோகத்தில் எப்பொழுதெல்லாம் அதர்மம் மேலோங்குகிறதோ அப்பொழுதெல்லாம் ஷங்கரின் கடவுள் அவதாரமெடுக்கிறார். அதர்மத்தை அதர்மத்தால் முறியடித்துத் தர்மத்தை நிலைநாட்டிவிட்டு மறைந்துவிடுகிறார். 
அர்ஜுன், கமல்ஹாசன், விக்ரம் போன்ற நாயகர்களின் வடிவில் முந்தைய யுகங்களில் மனிதனுக்குரிய குணாம்சங்களோடு அவதரித்த ஷங்கரின் கடவுள் இப்பொழுது நேரடியாகக் கீழே வந்து தன்னுடைய ரசிகர்களுக்கு 'விஸ்வரூபதரிசனம்' தந்திருக்கிறார். 

முந்தைய யுகங்களின் அதர்மக்காரியங்களுக்கும் 'சிவாஜி' யுகத்தின் அதர்மக்காரியங்களுக்கும் பெரிய வித்தியாசமிருக்கிறது. அதர்மத்தைத் தூண்டும் இந்த யுகத்தின் அசுரர்கள் ஐந்துக்கும் பத்துக்கும் கை நீட்டும் சாதாரண அரசு ஊழியர்களோ பெட்டிக் கடைக்காரர்களோ தெருச் சுற்றிகளோ அல்லர். கல்வி நிறுவனங்களில் கோடிக்கணக்கான ரூபாய் முதலீடு செய்து வரம்பே இல்லாமல் கொள்ளையடிக்கும் பகாசுரன். 

அவனுடைய சுட்டுவிரல் நுனியில் நின்று சுழன்று கொண்டிருக்கிறது அரசாங்கம். காசிமேட்டைப் பூர்வீகமாகக் கொண்ட ஆதிசேஷன் என்னும் அந்த அசுரனை அழிக்க, சாஃப்ட்வேர் இன்ஜினியரின் ரூபத்தில் அமெரிக்காவிலிருந்து டாலர் மூட்டைகளுடன் வந்திறங்குகிறார் கடவுள்.

அவனைச் சும்மா போகிறபோக்கில் வதம் செய்துவிட முடியுமா? அதற்காகத்தான் ரஜினி தேவைப்படுகிறார். ஏ.வி.எம். என்னும் பெருமுதலாளியின் முதலீடு தேவைப்படுகிறது ஷங்கருக்கு. ரஜினி ஏற்கனவே தமிழக விளிம்பு நிலை மனிதர்களின் கடவுள். அவரை எல்லோருக்குமான கடவுளாக ஏற்றுக்கொள்ளச் செய்வதற்கான 'திருப்பணி'களை ஊடகங்களின் துணையோடு மேற்கொண்டது 

ஏ.வி.எம். நிறுவனம். சி.என்.என். ஐ.பி.என்., டைம்ஸ்நௌ, என்.டி.டி.வி. போன்ற ஆங்கிலச் செய்தி சானல்களின் உபயத்தால் ரஜினி இப்பொழுது இந்திய நடுத்தர, உயர் நடுத்தர வர்க்கத்தினருக்குமான கடவுளாக ஏற்றுக்கொள்ளப்பட்டிருக்கிறார். 

ஷங்கரின் சமூகப் பொறுப்பு உலகறிந்தது. ஊழலுக்கெதிராகப் போராடுவதில் அவருக்கு நிகரான இயக்குநர்கள் யாருமில்லை. சதா சர்வகாலமும் தமிழ்ச்சமூகத்தின் எதிர்காலம் குறித்தே சிந்தித்துக்கொண்டிருப்பவர். அதன் தற்போதைய சீரழிந்த நிலைக்கான காரணங்களையும் அதற்கான தீர்வையும் தேடுவதில் தனது வாழ்நாட்களையும் பணத்தையும் செலவிட்டுக்கொண்டிருப்பவர். வாய்ப்புக் கிடைக்கும்பொழுதெல்லாம் தீர்க்கவும் (தீர்த்துக்கட்டவும்) செய்திருக்கிறார். அதற்கு கே.டி. குஞ்சுமோன், 'சிந்தனைச் சிற்பி' சுஜாதா எனப் பலரும் துணை நின்றிருக்கிறார்கள்.

ஆனால், தீர்க்கத் தீர்க்கச் சீரழிவு பெருகிக்கொண்டே போகிறது. இந்த அரசு அதிகாரிகளும் குமாஸ்தாக்களும் மந்திரிகளும் அரசியல்வாதிகளும் 'லஞ்சம் வாங்காதே' என்று ஒரு தடவை சொன்னால் கேட்கமாட்டேன் என்கிறார்கள். 'நூறு தடவை சொன்னா'லாவது கேட்பார்களா என்னும் அவரது பொறுப்புணர்வு மிக்க சிந்தனையின் விளைவே ரஜினி அவருடைய படத்தின் நாயகரானதற்கான காரணமாயிருக்க வேண்டும்.


மக்கள் செய்ய வேண்டியதெல்லாம் இந்தத் திரைப்படத்தை எப்பாடுபட்டாவது ஒன்றுக்குப் பத்துத் தடவை பார்க்க வேண்டியது மட்டும்தான். 'மற்றதை' அவர்கள் பார்த்துக்கொள்வார்கள். ரஜினி தனியொரு மனிதனாகவேகூடப் பார்த்துக்கொள்வார். அவர் சிங்கம்; பன்றி அல்ல. இந்நாள் முதல்வரும் முன்னாள் முதல்வரும் இந்தப் படத்தை அடுத்தடுத்துப் பார்த்து 'நல்ல படம்' எனச் சான்றிதழ் வழங்கிவிட்டார்கள். அவர்களுக்குப் பின்னால் இருக்கும் 'கூட்டம்' அவர்களைப் பின்தொடர்கிறது. 

பிரம்மாண்டங்களின் மீதும் கிராபிக்ஸ் போன்ற நவீன உத்திகளின் மீதும் ஷங்கருக்கு இருக்கும் மோகத்தைப் பயன்படுத்திக்கொண்டு தன் நிலையை மேம்படுத்திக்கொண்டுள்ளார் ரஜினி. அவரது ஒப்பனைகளும் உடையலங்காரங்களும் சண்டையும் நடனமும் இளம் நடிகர்களுக்குக் கலக்கத்தை ஏற்படுத்தியிருப்பதாகச் சொல்லப்படுகிறது. பாபாவின் தோல்வியிலிருந்து பாடம் கற்றுக்கொண்ட ரஜினி, ஒரு நடிகராகத் தனது ரசிகர்களின் எதிர்பார்ப்புகளைப் பூர்த்திசெய்வதற்கு முக்கியத்துவமளித்திருக்கிறார். ஷங்கர், சுஜாதா கூட்டணியின் திரைக்கதை வழக்கமான ரஜினி பட பார்முலாக்களோடு சமரசம் செய்துகொண்டுள்ளது. ஷங்கர் படங்களின் அடையாளமாக விளங்கும் அதிகார அமைப்பின் மீதான விமர்சனங்கள் மென்மையாக்கப்பட்டு ரஜினியின் பழிதீர்க்கும் கதையாடல் உத்திக்கு அளிக்கப்பட்டிருக்கும் முக்கியத்துவத்தை 'ரஜினி விளைவு' என்றுகூடச் சொல்லலாம். ஆனால் ஷங்கர்- சுஜாதா கூட்டணியின் நுண் அரசியல் படம் முழுவதும் கிருமிகளைப் போல் பரவியிருக்கிறது.

நகைச்சுவைப் பாத்திரமொன்றில் நடித்திருக்கும் பேராசிரியர் சாலமன் பாப்பையா 'அங்கவை, சங்கவை' என்னும் கறுப்பு நிறம் கொண்ட தன் மகள்களைக்காட்டி 'எங்கிட்ட ரெண்டு பொண்ணுக இருக்கு, கட்டறதா இருந்தா கட்டிக்குங்க, பழகறதுன்னா பழகிக்கிங்க' என 'இளிக்கும்'பொழுது சிரிப்பொலியால் தியேட்டர் அதிர்கிறது. 

சிரிப்பைத் தூண்டியது சாலமன் பாப்பையா பேசிய வசனங்களா அந்தப் பெண்களின் தோற்றமா? படத்தில் ரஜினி பேசும் 'சொன்னா அதிருதில்ல?' என்னும் 'பஞ்ச் டயலாக்' ரஜினி ரசிகர்களால் வெவ்வேறு தருணங்களில் பலவித அர்த்தங்களில் பிர யோகிக்கப்படுகிறது. 

ரஜினி ரசிகர்கள் கறுப்பான இளம் பெண்களைக் குறிப்பிடுவதற்குப் பாரி மகளிரின் பெயரைக் கேலியாகப் பயன்படுத்தத் தொடங்கியிருக்கிறார்கள். சென்னையின் பேருந்து நிறுத்தமொன்றில் நின்றுகொண்டிருந்த ஒரு இளம்பெண்ணைக் காட்டி, 'அங்க ஒரு அங்கவை சங்கவை நிக்குது பாரு' என ஒரு இளைஞன் சொன்னதைக் கேட்டபொழுது அது ரஜினி விளைவாக அல்ல, சுஜாதா-ஷங்கர் விளைவாகவே தோன்றியது எனக்கு. 

கறுப்பாக இருப்பது தொடர்பான தாழ்வு மனப்பான்மையை ஆழப்படுத்தும் இக்காட்சிகளில் பேசப்படும் வசனங்களில் தென்படும் விரசத்தையும் விஷமத்தனத்தையும் தமிழ் ரசிகர் 'கூட்டம்' கைதட்டி ரசிக்கும் என்பதில் ஷங்கருக்கோ சுஜாதாவுக்கோ எள்ளளவும் சந்தேகம் தோன்றியிருக்க முடியாது. 

சமூகத்தின் நெருக்கடிகளையும் தனிமனிதனின் பலவீனங்களையும் மட்டம்தட்டும் சொல்லாடல்கள் தொடர்ந்து நம்மைச் சிரிக்க வைத்துக்கொண்டிருக்கின்றன. வெள்ளைச்சட்டையில் குங்குமப் பொட்டு வைத்துக்கொண்டிருக்கும் ரவுடி ஆதிசேஷனின் பூர்வாசிரமம் சென்னையின் விளிம்புநிலை மனிதர்கள் வாழும் காசிமேடு. காசிமேடு போலீஸ் ரெக்கார்டுகளில் இடம்பெற்றுள்ள ரவுடி அவன். பிராமணர்கள் அதிகமாக வசிக்கும் மயிலாப்பூரையோ திருவல்லிக்கேணியையோ மேற்கு மாம்பலத்தையோ அப்படியொரு கொடிய வில்லனின் பூர்வீகமாகக் கற்பனை செய்ய முடியாததும்கூட சுஜாதாவின், ஷங்கரின் நுண்அரசியலின் விளைவுகள்தாம்.

இப்படத்தின் முதிர்ச்சியற்ற திரைக்கதையையும் விஷமத்தனமான வசனங்களையும் சிறுபிள்ளைத்தனமான தொழில்நுட்ப அம்சங்களையும் கொண்டாடும் ஊடக அரசியலைப் பற்றித் தனியே எழுத வேண்டும்.

கையில் ஒரு லேப்டாப்பையும் மனம் திருந்திய சில ரவுடிகளையும் பக்கத்தில் வைத்துக்கொண்டு ஒரு சில நாள்களுக்குள் 46 ஆயிரம் கோடி ரூபாய் கறுப்புப் பணத்தை வெளியே கொண்டுவந்துவிடும் சாமர்த்தியம் கொண்ட ஒரு கற்பனையான நாயகனை மையப்படுத்தித் தமிழ் வாழ்வின் பல கூறுகளை நுட்பமான முறையில் கொச்சைப்படுத்தும் இத்திரைப்படத்தைப் பொருட்படுத்துவதற்கோ விவாதிப்பதற்கோ ஒன்றுமில்லைதான். 

(எல்லா பத்திரிகைகளும் சாதா 'சிவாஜி' வெளியிட்ட சமயத்தில் 'ஜால்ரா' அடிக்க, காலச்சுவடு இதழ் மட்டுமே படம் பற்றி நேர்மையொடு பிரசுகரித்த ஒரு விமர்சனத்தை, "3டி சிவாஜி" வரப்போகும் இந்த சமயத்தில் இங்கே மறுபதிப்பு செய்து உள்ளேன். கட்டுரையாசிரியர் : தேவிபாரதி.)

டெசோ மாநாடு - ஒரு சிறப்புக் கவிதை

காலம்காலமாக தமது சொந்த மீனவர்கள் சுடப்படுவதைக்கூட தடுத்து நிறுத்த முடியாதவர்கள், இப்படி எல்லாம் கூத்தடிக்கும்போது, யாழ்ப்பாணத்தில் புழக்கதில் உள்ள ஒரு பழமொழிதான் என் நினனவுக்கு வருகிறது. "கூரை ஏறி கோழி பிடிக்க முடியாதவன், வானம் ஏறி வைகுண்டம் போனானாம்"  - டெசோ குறித்து ஈழ எழுத்தாளர் சமயந்தன்.

 

கன்னித்தீவாய் தொடரும்

காவேரி நதிநீர்ப்

பிரச்சினையின் வயது

வருடங்கள் நாற்பது.

நூலாறாய் ஒடும்

பாலாற்றுக்கும்

வந்ததடா சோதனை

ஆந்திர அணை

முல்லை பெரியாரில்

மூச்சுமுட்டி நிற்கிறது

நம் தமிழக உரிமை.

சிறுநீர் கழிப்பிடமாக

சிறுவாணி ஆற்றை

மாற்றும்

முயற்சியில் இருக்கிறது

கேரள அரசு.

தமிழின துரோகம்

.என்பதின்

அடையாள சின்னமாய்..

கச்சத் தீவு.

வாரம் தோறும்

ராமேஸ்வர மீனவர்கள் மீது

'பயிற்சி ஆட்டம்' ஆடுவது

இலங்கை ராணுவத்துக்கு

வாடிக்கை.

சொந்த நாட்டு

அகதிகளாய்..

நம் மீனவர்கள்.

  

இப்படி

உள்ளூரில் இருக்கும்

'ஆணிகளை' 

புடுங்க வக்கில்லாத

பண்ணாடைகள் எல்லாம்

ஒன்றுகூடுகிறார்களாம்

"டெசோ மாநாடு"

என்னும் பெயரில்

வெளியுரில் இருக்கும்

'மலையை' பெயர்க்க

கெடுகெட்ட

அரசியல் சவாரிக்கு

இரண்டு குதிரைகள்.

ஒன்று

இங்கிருக்கும்

தமிழர்கள்.

இன்னொன்று

ஈழத் தமிழர்கள்.

கூவம் ஆறும்

மணக்கிறது

இவர்களின்

சாக்கடை அரசியலின்

முடை நாற்றத்தில்.

ஒருவரி விமர்சனம்

டெசோ மாநாடு -

தூத்தேறி.

கவிதை : இன்பா

காத்திருப்பு

ஒரு பிரிவின் வலி..

ஒவ்வொரு ஞாயிறு

உறங்கப்போகும் போதும்.


திங்கட்கிழமை காலைப்பொழுதுகளில்

தொடங்கிவிடுகிறது

ஞாயிற்றுக்கிழமைக்கான

காத்திருப்பு.


அவசரகதி இயந்திரஒட்டம்

அரைகுறை உணவு என

இரண்டு சக்கரங்கள்

ஞாயிறு தவிர

வாரத்தின்

மற்ற நாட்களுக்கு.


நிம்மதிப் பெருமூச்சு வரும்

அலுவலகம் முடியும்

ஓவ்வொரு

சனிக்கிழமை மாலையும்

தியான அநுபவம்.


நிதானவிழிப்பு

காபி அருந்தியபடி

வாசிப்பு

விரும்பிய உணவு

மதிய உறக்கம்

பிடித்தச் சேனல்

இப்படி

பணிச்சுமையை

இறக்கிவைக்கும்

நாளல்லவா ஞாயிறு?


"வீட்லேயே அடைஞ்சு இருக்கேன்.

நாளைக்கு..." என இழுக்கும்

என் மனைவிக்கு

தெரிந்திருக்க நியாயமில்லை

இந்த

ஒரு நாள்

வரம் வாங்க

நான் இருக்கும்

ஆறு நாள் தவத்தை.



கவிதை : இன்பா